Rreziku i zjarreve në deponi të mbeturinave – Agjencia e Mjedisit kërkon masa urgjente
Agjencia për Mbrojtjen e Mjedisit të Kosovës ka bërë thirrje urgjente për parandalimin e zjarreve në deponitë urbane të mbeturinave, duke theksuar se rritja e temperaturave gjatë verës rrit ndjeshëm rrezikun për shpërthime zjarri.
Në njoftimin e publikuar në Facebook, Agjencia apelon për ndërhyrje të menjëhershme nga institucionet përgjegjëse, sidomos komunat, autoritetet lokale dhe operatorët e menaxhimit të mbeturinave.
Njoftimi i plotë:
” Thirrje për Marrjen e Masave të Menjëhershme për Parandalimin e Zjarreve në Deponitë Urbane të Mbeturinave në Kosovë
Me rritjen e temperaturave gjatë muajve të verës, rreziku për shpërthimin e zjarreve në deponitë e mbeturinave është shumë i lartë. Prandaj, bëjmë apel të fuqishëm për marrjen e masave të menjëhershme parandaluese nga të gjitha institucionet përgjegjëse.
Pse është kjo çështje urgjente?
Zjarret në deponi përbëjnë rrezik serioz për shëndetin e qytetarëve dhe mjedisin, siç u dëshmua edhe nga rasti i fundit i zjarrit në deponinë e Elbasanit në Shqipëri.
Kush duhet të veprojë?
• Komunat dhe autoritetet lokale
• Operatorët e menaxhimit të mbeturinave
• Veçanërisht menaxherët e deponive komunale.
✅ Masat që kërkohen:
1. Inspektime dhe monitorim të shtuar për të identifikuar vatrat e mundshme të zjarrit.
2. Vendosja e rojeve dhe patrullimeve, sidomos gjatë orëve me rrezik të lartë (mesditë, pasdite).
3. Krijimi i brezave të pastruar përreth deponive, për të parandaluar përhapjen e flakëve.
4. Sigurimi i mjeteve për ndërhyrje të shpejtë, përfshirë ujë dhe pajisje zjarrfikëse.
5. Sensibilizimi i qytetarëve për të shmangur hedhjen e materialeve të ndezura apo të rrezikshme pranë deponive.
6. Vendosja e rezervuarëve me ujë dhe mjete profesionale brenda perimetrit të deponive.
⚠️ Pasojat nga djegia e mbeturinave urbane
Dëmet për mjedisin:
• Ndotje e ajrit nga gazrat toksikë (CO₂, SO₂, NOx, PM10, PM2.5, dioksina dhe furane).
• Ndotje e ujit dhe tokës nga metalet e rënda që rrjedhin nga hiri i djegur.
• Ndikim negativ në biodiversitet.
Rreziqet për shëndetin:
• Sëmundje të frymëmarrjes (astmë, bronkit, sëmundje kronike).
• Probleme kardiovaskulare (infarkte, goditje në tru).
• Rrezik për kancer nga ekspozimi ndaj dioksinave dhe substancave kancerogjene.
• Dëme në sistemin nervor, veçanërisht tek fëmijët.
• Çrregullime hormonale dhe probleme në sistemin riprodhues.
Thirrje për qytetarët
Qytetarë të nderuar, ndihmoni në mbrojtjen e jetës dhe mjedisit!
Nëse shihni ndonjë vatër zjarri ose tym të dyshimtë afër ndonjë deponie, raportoni menjëherë duke telefonuar:
Shërbimi Zjarrfikës – 193
Qendra Operative Emergjente – 112
Raportimi i gjelbër / MMPHI – (0) 800-00013
Policia e Kosovës – 192
Së bashku mund të parandalojmë dëmet e mëdha mjedisore dhe të mbrojmë shëndetin e të gjithëve!”, thuhet në njoftim.
