“Mos na qitni hi syve”, Çitaku i reagon ambasadorit Hargreaves i cili tha se dënimet në Hagë “kanë të bëjnë me krime individuale”

Nënkryetarja e PDK-së, Vlora Çitaku, i ka reaguar ambasadori britanik, Jonathan Hargreaves, për komentin e tij për aktgjykimin e Hagës.

Në një postim në profilin e saj, Çitaku në FB ka shkruar:

Ambasadori britanik në Prishtinë, mes tjerash, paska thënë se: “Dënimet në Hagë kanë të bëjnë me krime individuale ndaj komuniteteve të ndryshme.”

Qartazi, Ambasadori i nderuar as nuk e ka lexuar aktakuzën, as nuk e ka përcjellë procesin, e as nuk e ka dëgjuar aktgjykimin e Gjykatës.

Sepse këtu nuk bëhet fjalë për dënime për vepra individuale.

UÇK është cilësuar si ndërmarrje e përbashkët kriminale.

Ky është thelbi. Kjo është pesha e këtij vendimi. Dhe këtë nuk mund ta mbuloni me një fjali diplomatike.

Mos na qitni hi syve.

Ju mundeni me e pranu këtë vendim. Mundeni me e relativizu. Mundeni me e reduktu në katër emra dhe me vazhdu tutje, sikur asgjë nuk ka ndodhur. Mundeni, përmes tij, me ble vullnet e paqe me Serbinë e me të tjerët.

Po ne jo.

Ne nuk kemi me heshtë derisa lufta jonë për liri të përshkruhet me gjuhën e kriminalitetit.

Nuk kemi me e pranu që historia jonë të rishkruhet për komoditetin politik të askujt.

Jo.

Jo në emrin tim.