Martohen Princi Leka II dhe Blerta Celibashi, kremtimi u bë në një ceremoni private

Princi Leka II, është martuar me Blerta Celibashin, ka njoftuar përmes një komunikate zyrtare Oborri Mbretëror Shqiptar.

Sipas njoftimit, martesa u kremtua në një ceremoni private, duke ruajtur karakterin e saj intim dhe solemn.

Fotografia zyrtare e publikuar me këtë rast, u tha se u realizua në Kështjellën Apponyi në Sllovaki.

“Përzgjedhja e këtij mjedisi historik, rezidencë e familjes fisnike të Lartmadhërisë së Saj Mbretëreshës Geraldinë, u bë për të nderuar trashëgiminë e saj të çmuar dhe origjinën hungareze, e cila mbetet një pjesë e pandarë e historisë së Familjes Mbretërore Shqiptare”, thuhet në njoftim.

Oborri Mbretëror njoftoi gjithashtu se “pas martesës, Princeshë Blerta do të mbajë mbiemrin e familjes Zogu dhe titullin Princeshë e Shqiptarëve”.

“Familja Mbretërore e ndan këtë lajm të gëzueshëm me kombin shqiptar dhe me miqtë e saj anembanë botës”, thuhet në fund të njoftimit.